चलचित्र ‘सत्यम्’मा नायिका मलिका महत्त अनुबन्ध भएकी छन् । नायक राजेश हमालको शिर्ष भूमिका रहने यो चलचित्रमा मलिकाको जोडी भने नायक पल शाहसँग बाँधिनेछ ।
गत वर्ष फुलबुट्टे सारी’ फिमेल भर्सनको म्युजिक भिडियोमा पहिलो पटक देखिएको जोडी हो, नायक पल शाह र नायिका मलिका महत्तको। यो पहिलो सहकार्यमा नै दर्शकले पल र मलिकाको जोडीलाई रुचाए । दर्शकले पल र मलिकाको जोडीलाई ‘पिएम जोडी’को नाम पनि दिएको छ ।
मलिकाले राजेश हमाल र पल शाहसँग पहिलो पटक ठूलो पर्दामा काम गर्दैछिन् । शंकर कार्कीको निर्देशनमा बन्न लागेको यो चलचित्रमा अनुप विक्रम शाही, अभय बराल र कृष्ण जोशीको पनि अभिनय हेर्न सकिनेछ । यो चलचित्रमा हमालको चार वटा लुक्स हेर्न पाइने निर्माणपक्षले बताएको छ ।
पर्दामा राजेश हमाल र अनुपले दोस्रो पल्ट सँगै काम गर्न लागेका हुन् । यसअघि उनीहरुले चलचित्र ‘सौर्य’ मा एकसाथ अभिनय गरेका थिए । नवयुग सिनेमाको प्रस्तुतीमा बन्न लागेको यो चलचित्रमा लेखन तथा निर्माण रेशम सापकोटाको रहनेछ ।
चलचित्रमा योगेशकाजीको संगीत, कुटुम्ब ब्याण्डको शिर्ष गीत, विदुर पाण्डेको छायांकन रहनेछ । अष्टमान महर्जनको एक्सन रहने चलचित्रमा रामजी लामिछानेको कोरियोग्राफी रहनेछ । आउँदो तिहारपछि मनाङ, मुस्ताङ, पोखरा र काठमाडौंमा यो चलचित्र खिचिनेछ ।
यो चलचित्रमा दक्षिण भारतीय चलचित्रहरुमा आशालाग्दो संभावना देखाएका कलाकार मिलन सिजापति खलपात्रको भूमिकामा देखिदैछ । यो चलचित्रबाट मोक्तर खान, कैलाश रावल, नेरिस्का स्थापित, प्रिन्स प्रसिद्द सिंह, प्रविण चापागाँई, अन्विशा खड्की लगायतका कलाकारहरुले डेब्यू गर्दैछन् ।
चलचित्र ‘यात्रा’ बाट अभिनेत्रीको रुपमा डेब्यू गरेकी मलिकाले यसपछि चलचित्र ‘पानीफोटो’ मा काम गरेकी थिइन् । यो चलचित्र प्रदर्शनमा आउन बाँकी छ ।
