नेपालकै पहिलो कमेडी रियालिटी शो ‘कमेडी च्याम्पियन’को दोश्रो सिजन ‘कमेडी च्याम्पियन २’का विजेता हुन् भरतमणी पौडेल । ‘कमेडी च्याम्पियन २’मा भरतमणीले पूर्व युवराज पारस शाहको अभिनय गरेका थिए। पारसको गेटअपमा देखिएका भरतमणीको अभिनयलाई दर्शकले खुबै मन पराएका थिए ।
भरतले लामो समयदेखि पारस शाहसँग प्रत्यक्ष भेटेर कुराकानी गर्ने अवसर पनि खोजिरहेका थिए । भरतमणीलाई भने पारस शाहले उनको अभिनयको बिषयमा के भन्छन् भन्ने कौतुहलता थियो । उनै, भरतमणीले शुक्रबार काठमाडौंको शेर्पा मलमा पूर्व युवराजसँग भेटेका छन् । पारस निकट व्यक्तिको सम्पर्कमा रहेका भरतमणीले उनकै सहयोगमा पारससँग भेट गरेका हुन् । भरतमणीसँग ‘कमेडी च्याम्पियन’को पहिलो सिजनका प्रतिस्पर्धी सुमन कोइराला पनि भेटमा सहभागी थिए ।
पारसले भरतमणीले आफ्नो क्यारिकेचर गरेको बिषयमा छोटो प्रतिक्रिया दिए । पारसले भरतमणीको प्रस्तुतिमा रमाइलो प्रतिक्रिया दिदै–‘फन्नी फन्नी । दामी थियो’ भनेका थिए ।
पारससँग तस्बिर खिचाउँदै भरतमणी लेख्छन्:नमस्ते ! एकदमै खुसी छु केही दिन अघि पुर्वयुबराज पारस शाह सङ्ग भेटघाट गर्ने अवसर मिल्यो , उहाँलाइ भेट्न म र सुमन कोइराला दरबार मार्गको शेर्पा मलमा गएका थियौ, लगभग १ घण्टाको बसाइमा रमाइलो गफगाफ भयो । उहाँको शुभचिन्तक थिए भेटघाट पछि झन् ठुलो प्रशंसक भए , साच्चैनै भन्ने नै हो भने उहाँ सारै रमाइलो साथी जस्तै हुनुहुँदो रहेछ यो अवसर मिलाइदिनु हुने मुनेन्द्र सरलाइ धेरै धेरै धन्यवाद ।
ताप्लेजुङका भरतमणि कमेडी च्याम्पियन सिजन २ को सुरुवातदेखि नै चर्चामा आएका थिए। तर,पूर्व सञ्चारमन्त्री गोकुल बास्कोटाको क्यारिकेचर गरेपछि दर्शकको ‘नोटिस’मा परेका थिए । त्यस्तै उनले सेमिफाइनलमा पूर्व युवराज पारस शाहको गेटअपमा उनको क्यारिकेचर गरेका थिए । जुन प्रस्तुतीबाट निकै तारिफ पाएका थिए ।
उनी ‘कमेडी च्याम्पियन’मा सात पटकसम्म ‘पर्फर्मर अफ द राउण्ड’ बनेका थिए । भरतमणिले पूर्वराजा ज्ञानेन्द्र शाह, लोसपा नेता राजेन्द्र महतोको क्यारिकेचर पनि हुबहु गर्ने गरेका छन् । खासगरी उनले घरबेटीको प्रसंग आफ्ना प्रस्तुतिमा दिँदा दर्शकले निकै मन पराएका छन्।
