चलचित्र ‘मनसँग मन’ को दोस्रो गीत सार्वजनिक भएको छ । निर्माण टिमले शुक्रवार साँझ चलचित्रमा समावेश ‘टपक्कै सयपत्रि’ बोलको मारुनी गीत सार्वजनिक गरेको हो ।
गीतमा भावना थापाको स्वर र अमोङ गुरुङको शब्द तथा संगीत रहेको छ । कमल राईको कोरियोग्राफी रहेको गीतको भिडियोमा अभिनेत्री वर्षा सिवाकोटीको मारुनी नाच देख्न सकिन्छ ।
गीतमा मारुनी नाचको माध्यमबाट तिहारको महत्त्वलाई पनि झल्काइएको छ । कैलाश राई निर्देशित यस चलचित्रमा वर्षासँगै पुष्प खड्का, बुद्धि तामाङ, रविन्द्र झा, चाँदनी प्रधान, महेन्द्र बागदास, शन्ते दाल लगायतको पनि अभिनय छ । पुष्प र वर्षा पहिलो पटक ठूलो पर्दामा स्क्रिन शेयर गरेका हुन् ।
सौरभ इन्टरनेन्मेन्ट र बलाली प्रोडक्शनको ब्यानरमा अरुण तामाङले निर्माण गरेको चलचित्रको कथा र पटकथा निर्देशक राईले तयार पारेका हुन् ।
चलचित्रको वितरण रीच इन्टरटेन्मेन्ट,जी।जी।ए ग्रूप र एफ डि कम्पनीले गर्दैछ। चलचित्रमा अर्जुन जिसीको सम्पादन, रामजी लामिछानेको कोरियोग्राफी र सन्तोष खवासको द्वन्द्व निर्देशन छ ।
‘चालबाज’ नाममा छायांकन भएको चलचित्रको पछि नाम परिवर्तन गरेर ‘मनसँग मन’ राखिएको हो । सस्पेन्स लभस्टोरी कथामा निर्माण भएको चलचित्रको अधिकांश छायांकन दार्जिलिङ आसपासमा भएको हो ।
यो चलचित्र कोरोना महामारीका कारण प्रदर्शनमा आउन सकेको छैन । गत चैत २७ गतेलाई चलचित्रको प्रदर्शन घोषणा गरिएको भए पनि कोरोना महामारीको दोस्रो लहर सुरु भएपछि निर्माण टिमले प्रदर्शन मिति स्थगन गरेको थियो ।
गीत हेर्नुहोस् :-
