चर्चित गायिका प्रविशा अधिकारीले आइतबार विवाह गरेकी छन् । झापा जिल्लाको विर्तामोड चारपानेका निर्माण सिटौलासँग उनी वैवाहिक जीवनमा बाँधिएकी हुन् । झापाको एक पार्टी प्यालेसमा उनीहरुको विवाह सम्पन्न भएको हो । विवाह गर्नुभन्दा तीन दिनअघि प्रविशा र निर्माणले औंठी साटेका थिए । प्रविशा र निर्माणको टिकाटालो पनि उनीहरुको गृह जिल्ला झापामा भएको थियो ।
विवाह अघि शनिवार प्रविशाले निर्माणको नामको मेहेन्दी पनि लगाएकी थिइन् । मेहेन्दी लगाएका केही तस्बिरहरू सञ्जालमा सार्वजनिक पनि भएका छन् । प्रविशा र निर्माण केही महिनादेखि प्रेम सम्बन्धमा थिए । विवाहमा प्रविशा रातो पहिरनमा सजिएकी थिइन् भने निर्माण सेतो र रातो दौरा-सुरुवालमा सजिएका थिए।
लामो समयदेखि अमेरिकामा बस्दै आएका प्रविशाका श्रीमान् आईटी क्षेत्रमा सक्रिय छन् । दशैंअघि प्रविशा र निर्माणबीच पहिलो पटक भेट भएको थियो । त्यसअघि उनीहरुको बोलचाल फेसबुकमा मात्र सीमित थियो । निर्माणको परिवारबाट बिहेको प्रस्ताव आएपछि प्रविशाले बुझेर निर्णय लिने भनेकी थिइन् । निर्माणको बानी ब्यहोरा मन परेपछि उनी बिहेको लागि राजी भएकी थिइन् । प्रविशा हिमालय टिभीबाट प्रसारण हुने रियालिटी शो ‘भ्वाइस किड्स’को कोच समेत हुन् ।
तस्विरमा हेर्नुहोस् गायिका प्रविशाको विहे
फोटो: मुखिया प्रोडक्सन
