२०७६ सालको असोजमा रिलिज भएको ब्लक्बस्टर चलचित्र ‘कबड्डी कबड्डी कबड्डी’ मंगलबार युट्युबमा सार्वजनिक गरिएको छ । ओएसआर डिजिटलको युट्युब च्यानलमा उक्त चर्चित चलचित्र सार्वजनिक भएको हो। व्यावसायिक रुपमा सफल रहेको यो चलचित्रले दर्शकको मन जित्न सफल भएको थियो।
रामबाबु गुरुङको निर्देशन रहेको चलचित्रमा दयाहाङ राई, उपासना सिंह ठकुरी, रिश्मा गुरुङ, कर्मा, विल्सन विक्रम राई, बुद्धि तामाङ, विजय बराल लगायतका कलाकार शीर्ष भूमिकामा छन् । त्यस्तै, चलचित्रमा पुस्कर गुरुङ, कविता आले, माओत्से गुरुङ, लुनिभा तुलाधर, कमलमणि नेपाल, अरुणा कार्की पोखरेल लगायतका कलाकारहरुको पनि अभिनय रहेको छ ।
निर्देशक गुरुङ र उपेन्द्र सुब्बाले लेखेको कथामा सिनेमा आर्टको प्रस्तुतिसँग बाँसुरी फिल्मस् र माउन्टेन स्टोरिजले सहकार्य गरेका छन् । शैलेन्द्र डि. कार्कीले खिचेको चलचित्रमा बासुरी फिल्मस्को निर्माण, सिनेमा आर्टको प्रस्तुति, माउण्टेन स्टोरिज र नौमती इन्टरटेन्मेन्टको सहकार्यमा निर्माण भएको हो ।
‘कबड्डी’का हरेक सिरिज व्यावसायिक रुपमा सफल छन् । यतिबेला ‘कबड्डी’को चौथौ सिक्वेल चलचित्र ‘कबड्डी ४’ निर्माणको क्रममा छ । चलचित्रको केही दिनअघि मात्रै छायाँकन सकिएको छ । ‘द फाइनल म्याच’ उप-शिर्षक राखिएको चलचित्रलाई ‘कबड्डी’ को अन्तिम भाग भनिएको छ ।
चलचित्र हेर्नुहोस् :-
