चर्चित भारतीय गायिका असीस कौर काठमाडौं आइपुगेकी छन् । भोलि जनवरी ८ तारिकमा काठमाडौंको दरबारमार्गस्थित क्लब प्लेटिनममा आयोजना हुने ‘राता लम्बिया नाइट विथ असीस कौर’ कन्सर्टका लागि उनी नेपाल आएकी हुन् ।
फेलिज इन्टरनेसनल इभेन्टले कन्सर्टको आयोजना गरेको हो । कौरको ‘राता लम्बिया’ गीतको चर्चालाई मध्यनजर गरी क्लब सञ्चालकले कौरलाइ कन्सर्टका लागि ल्याएका हुन् । कार्यक्रममा कौरका अलावा नेपाली गायक याबेश थापाको समेत प्रस्तुति रहनेछ ।
असीस कौरको पछिल्लो समय ‘राता लम्बिया’ गीत निकै हिट छ । उनले इण्डियन आइडल, आवाज पञ्जाब दी लगायतका विभिन्न गायन रियालिटी शोमा भाग लिएकी थिइन् । सन् २०२० मा खुदा हाफिज चलचित्रको ‘जान बन गए’ बोलको गीतले उनलाई चर्चामा ल्याएको हो । पाँच वर्षको हुँदादेखि नै गायन क्षेत्रमा लागेकी कौरले ‘तमाचे’ चलचित्रको ‘दिलदारा रिप्राइज’ मार्फत् बलिउडमा डेब्यू गरेकी थिइन् । त्यसयता उनले बलिउडका थुप्रै चलचित्रको गीतमा आफ्नो आवाज दिइसकेकी छिन् ।
नेपाली दर्शकको बलिउड सेलिब्रेटी भेट्ने र सँगै नाच्ने चाहना पुरा गर्न कार्यक्रम आयोजना गर्न लागेको आयोजक संस्थाका सिइयो शाहिल खानले बताए ।
