प्रतीक्षित चलचित्र ‘चपली हाइट ३’ भोलि, शुक्रबारदेखि देशभरका हलमा प्रदर्शन हुँदै छ । उक्त चलचित्रको बुकिङ खुल्ला गरिएको छ । देशभरका सबै मल्टिप्लेक्सले बुधबारबाट नै चलचित्रको बुकिङ खुल्ला गरेका हुन् । चलचित्रको एडभान्स बुकिङ राम्रै भइरहेको बताईएको छ ।
यतिबेला मल्टीप्लेक्सहरुमा ‘पुष्पा’, ‘स्पाइडर म्यान’, ‘अतरंगी रे’ र नेपाली चलचित्र ‘कठपुतली’ प्रदर्शनरत छ । यसैक्रममा ‘चपली हाइट ३’ ले मल्टीप्लेक्सहरुमा उच्च शो पाएको छ छ । नेपालको सबैभन्दा ठूलो मल्टीप्लेक्स चेन क्यूफएक्सले आफ्नो ९ वटा मेजर स्टेशनमा २६ शो दिएको छ । त्यस्तै, चलचित्रले क्यूज सिनेमाज्मा ५ शो, कीर्तिपुर सिनेप्लेक्समा २ शो, एफक्यूब सिनेमाज्मा ५ शो, सिडिसी सिनेमाज्मा ५ शो, बिग मुभिजले ४ शो, आइएनआइ सिनेमाज्मा ४ शो पाएको छ ।
चलचित्रले सिंगल थिएटर पनि पर्याप्य पाएको बताइएको छ ।
२०७६ सालमा कोरोना महामारीका कारण चलचित्रको रिलिज रोकिएको थियो । धेरै लामो पर्खाईपछि ‘चपली हाइट ३’ प्रदर्शन हुँदैछ । देशभरका अधिकांश मल्टीप्लेक्सहरुमा चलचित्रले पाएको शोज देख्दा चलचित्रले आक्रामक ब्यापार गर्ने अनुमान गर्न सकिन्छ।
‘फाटेको जुत्ता’ फेम्ड निर्देशक निकेश खड्का निर्देशित चलचित्र ‘चपली हाइट ३’ मा स्वस्तिमा खड्का, आमिर गौतम, सुपुष्पा भट्ट, महेश त्रिपाठी, अर्पण थापा, तीकमान श्रेष्ठ, दीपाश्री निरौला, लक्ष्मी बर्देवा, लोकेन्द्र लेखक, विशाल पहारी, जीवन भट्टराई, सुष्मा निरौला लगायतका कलाकारहरुको अभिनय रहेको छ । आकाश बरालको पटकथा तथा संवाद रहेको चलचित्रमा सुभाष भुषाल र अर्जुन कुमारको संगीत छ । अष्ट महर्जनले चलचित्रको एक्सन दृश्यको कोरियोग्राफी गरेका हुन् । सस्पेन्स थ्रीलर कथामा निर्माण गरिएको चलचित्र ‘चपली हाइट ३’लाई काठमाण्डौ र यसको आसपासको क्षेत्रमा खिचिएको छ ।
नाम नै ब्रान्ड बनिसकेको यस चलचित्रमा स्वस्तिमा-महेश र सुपुष्पा-प्रतिकको जोडी बाँधिएको छ । ‘चपली हाइट ३’ लाई अर्जुन कुमार फिल्मस् र केडिसी हस्पिटलले मिलेर निर्माण गरेका हुन् ।
