सुदर्शन थापाको निर्माण तथा निर्देशनमा तयार भएको प्रतिक्षीत चलचित्र ‘म यस्तो गीत गाउँछु २’ फागुन १३ गतेबाट प्रदर्शनमा आउने भएको छ । फागुन १ गतेबाट हलहरु खुल्ने भएपछि मंगलवार नेपाल चलचित्र संघमा बसेको चलचित्र निर्माता संघका तर्फबाट उदय सुब्बा र चलचित्र संघका तर्फबाट अशोक शर्मा नेतृत्वको कार्यदलले चलचित्रलाई शिवरात्रीको छेको पारेर फागुन १३ गते प्रदर्शन गर्ने निर्णय गरेको हो ।
यो चलचित्रको रिलिज मिति गत माघ १९ गतेलाई तोकिएको थियो । तर, कोरोनाको तेस्रो लहर फैलिए पछि सरकारले माघ ३ गतेबाट हल बन्द गर्ने निर्णय गरेपछि चलचित्र रिलिज हुन सकेन। कोरोना महामारी अगाडि नै यो चलचित्र रिलिजका लागि तयार भएको थियो । तर,विश्वभर कोरोना भाइरस (कोभिड-१९)को त्रास नेपालमा पनि बढेसँगै यसैलाई मध्यनजर गर्दै २०७६ साल,फागुन ३० गतेबाट प्रदर्शन गरिने भनिएको चलचित्रको प्रदर्शन रोकिएको थियो।
अभिनेत्री पूजा शर्मा र अभिनेता पल शाहको मुख्य भूमिका रहेको चलचित्रको सार्वजनिक भएको ‘तिम्रो घरको वरिपरि’,‘दुःखको काँडा’ र ‘कसम कसम’ बोलको गीतलाई दर्शक तथा श्रोताले निकै रुचाएका छन् । चलचित्रको ट्रेलरलाई पनि दर्शकले अत्याधिक मन पराएका छन् ।
सांगीतिक प्रेम कथामा तयार भएको चलचित्र ‘म यस्तो गीत गाउँछु २’ मा पल र पूजाका अलावा हरिहर शर्मा, दिनेश डिसी, राजा राजेन्द्र पोखरेल, सोनिका रोकायलगायतका कलाकारहरुको अभिनय छ ।
